Ліставёрткі (Tortricidae або Olethreutidae) — сямейства насякомых атрада матылёў.
Размах крылаў 8—40 мм (звычайна 10—25 мм), пярэднія крылы рознай афарбоўкі, заднія шэрыя або бурыя. Лічынкі (вусені) даўжынёй да 20 мм, зеленаватыя, карычневыя або жаўтаватыя, жывуць у скручаных лісцях (адсюль назва), праточваюць хады ў каранях, пад карой, у парастках, пладах, суквеццях, шышках, дзе і акукліваюцца.
Больш за 5 тыс. відаў. Пашыраны ўсюды, акрамя Антарктыды, найбольш у трапічных і шыракалістых лясах Азіі. На Беларусі 240 відаў, найбольш трапляюцца ліставёртка дубовая зялёная (Tortrix viridana), яблыневая пладажэрка (Cydia pomonella), парасткаўюны (Rhyacionia) і інш. Многія віды — шкоднікі лесу, саду, сельскагаспадарчых культур.
Сямейства ліставёртак налічвае звыш 750 радоў і 6300 відаў.