Зеляну́шкі (Dolichopodidae) — сямейства насякомых атрада двухкрылых.
Даўжыня 1,2—8 мм. Цела металічна-зялёнае. Вочы вялікія. Вусікі кароткія, трохчленікавыя. Крылы празрыстыя з трыма радыяльнымі жылкамі. Ногі тонкія.
Пашыраны на ўсіх кантынентах. Вядома больш за 7000 відаў. На Беларусі на траве, лісці, хмызняку, пяску каля вадаёмаў, на паверхні вады, ствалах дрэў, пашкоджаных караедамі, найбольш трапляюцца прадстаўнікі родаў Dolichopus і Neurigona, пераважна зелянушка кіпцюрападобная (Dolichopus ungulatus).
Большасць відаў — драпежнікі, кормяцца нагахвосткамі, тлямі, чарвямі, ёсць раслінаедныя.
Развіццё з поўным ператварэннем. За год адна—дзве генерацыі. Зімуюць у фазе лічынкі.