У Вікіпедыі ёсць артыкулы пра іншых асоб з прозвішчам Лебедзева. Галіна Міхайлаўна Лебедзева (нар. 17 ліпеня 1976, Віцебск) — беларуская спартсменка (скачкі на батуце). Майстар спорту СССР (1991), майстар спорту Рэспублікі Беларусь міжнароднага класа (1993). Заслужаны майстар спорту Рэспублікі Беларусь (1998).
Чэмпіёнка свету 2003 года ў сінхронных скачках на батуце. Сярэбраны прызёр чэмпіянату свету на батуце 1994 года ў сінхронных скачках, 1996 года — у камандных спаборніцтвах і сінхронных скачках, 1998 года — у камандных спаборніцтвах. Бронзавы прызёр чэмпіянату свету 1996 года ў індывідуальных скачках, 1999 года — у камандных спаборніцтвах, 2001 года — у сінхронных скачках.
Чэмпіёнка Еўропы 1997 года ў індывідуальных скачках, 1998 года — у камандных спаборніцтвах, 2000, 2002 і 2004 гг. — у сінхронных скачках. Сярэбраны прызёр чэмпіянату Еўропы па скачках на батуце 1995 і 1997 гг. у камандных спаборніцтвах, 1998 года — у індывідуальных і сінхронных скачках. Бронзавы прызёр чэмпіянату Еўропы па скачках на батуце 1993 года ў камандных спаборніцтвах, 1995 і 2002 гг. — у індывідуальных скачках. Сярэбраны прызёр Кубка свету 1995 года ў сінхронных скачках, 1997 года — у індывідуальных і сінхронных скачках. Сярэбраны прызёр Сусветных гульняў 1997 года ў сінхронных скачках.
З 1992 года працавала інструктарам нацыянальнай каманды Рэспублікі Беларусь па скачках на батуце.